9 верасня Гродна адсвяткаваў сваё 895-годдзе. Адной з лакацый свята # ГРОДНО7Я! стаў парк Жылібера, дзе разам з іншымі сваю пляцоўку арганізавалі і гарадскія бібліятэкі. Бібліяфест «Горад мары» атрымаўся на славу. Адкрываючы яго, арганізатары ўшаноўвалі сямейныя дынастыі гродзенцаў, некалькі пакаленняў якіх ужо шмат гадоў карыстаецца паслугамі бібліятэк і актыўна чытае. Для падлеткаў правялі літаратурны квэст.
Малых і бацькоў запрашалі ў гульнятэку: тут можна было скласці пазлы з выявай архітэктурных помнікаў Гродна, памаляваць, выканаць няпростыя заданні квэста «Аўтастопам па Гродна», вырашыць крыжаванкі на асфальце, сканструяваць з лега свой горад і паўдзельнічаць у майстар-класе мастацкага роспісу па целе. .
Задаць пытанні пісьменніку і атрымаць аўтограф змаглі тыя, хто прыйшоў на «Літаратурную гарбату» з удзелам Гродзенскага аддзялення Саюза пісьменнікаў Беларусі – Л.Кебіч, Д. Радзівончыкам, Т. Сучковай, А. Скаржынскай-Савіцкай. Маладая дзіцячая пісьменніца Юлія Сноп распавяла школьнікам пра свае кнігі, і пра тое, якімі шляхамі прыйшла ў літаратуру.
Выставы літаратуры з фондаў Гродзенскай гарадской цэнтральнай бібліятэкі імя А. Макаёнка «Гродна-горад-казка, горад-мара» і «Лепшыя кнігі ў старых валізках» прыцягнулі да сябе ўвагу шматлікіх аматараў чытання.
У арт-book фотазоны «Гродна-895!» збіраліся гродзенцы не толькі, для таго, каб сфатаграфавацца, але і каб з цікавасцю пагартаць кнігі вядомага краязнаўцы В.Ю. Саяпіна. Экспазіцыя рэпрадукцый работ Напалеона Орды «Архітэктура Гродна 1840-1880 гг.» размясцілася на мальбертах і прыцягвала ўвагу шматлікіх гасцей свята.
«Замкі Беларусі» – яшчэ адзін пункт на карце бібліяфеста. Тут размяшчаліся макеты замкаў з калекцыі Ігара Адасіка і кнігі, пра гэтыя замкі распавядаюць. Удзельнікі майстар-класа «Валошкавы колер Беларусі» не сышлі без уласнаручна зробленых кніжных закладак і васількоў з паперы. Многія таксама паспрабавалі сябе ў гульні на цымбалах, бібліятэкары далі і такую магчымасць усім жадаючым.
Удзельнікі народнага калектыву аўтарскай песні і паэзіі «Аўтарак» Тата'яна і Павел Салаўёвы выканалі свае вядомыя кампазіцыі на вершы Л.Найдуса, П. Салаўёва і іншых аўтараў. Бібліяфест быў арганізаваны Гродзенскім гарадскім цэнтрам культуры, цэнтралізаванай бібліятэчнай сістэмай г. Гродна і абласной навуковай бібліятэкай імя Е.Ф. Карскага.