Чый Дзед Мароз?

12 снежня аддзел абслугоўвання дзяцей Гродзенскай гарадской цэнтральнай бібліятэкі імя А.Макаёнка наведалі навучэнцы 4 «А» СШ №6. Напярэдадні зімовых святаў была праведзена віктарына «Чый гэта Дзед Мароз?». Па апісанні казачнага персанажа і яго памочнікаў трэба было адгадаць, з якой краіны той ці іншы Дзед Мароз. А дзякуючы электроннай прэзентацыі можна было ўбачыць, як ён выглядае. Колькі новага даведаліся хлопчыкі і дзяўчынкі пра шведскага Юлтомтене і французскага Пер-Ноэль, аб чэшскім Мікулаш і беларускім Зюзе! У канцы мерапрыемства пазнаёміліся з рэзідэнцыяй Дзеда Мароза ў Белавежскай пушчы і пачулі пра цуды, якія чакаюць там усіх наведвальнікаў.

Перадсвяточны перапалох

11 снежня бібліятэцы № 8 напярэдадні навагодніх святаў была праведзена пазнавальна-забаўляльная праграма. Трэцякласнікі гімназіі №5 даведаліся пра паходжанне і традыцыі любімага свята, пра тое, што такое знакі Задыяка, атрымалі адказ на пытанне, чаму 2020 год па ўсходнім календары будзе годам белай металічнай пацукі, паглядзелі мультфільм «12 жывёл кітайскага календара». Далей адправіліся ў віртуальнае казачнае падарожжа ў рэзідэнцыю Дзеда Мароза – Белавежскую пушчу, прынялі ўдзел у вясёлай навагодняй віктарыне, вырашылі навагодні рэбус, праспявалі ў караоке «Новы год ідзе».

Ражство з Пэтсанам і Фіндусам

11 снежня бібліятэкар аддзела абслугоўвання дзяцей ГЦБ ім. А. Макаёнка зноў наведала дзіцячы сад №44. Выхаванцы старэйшых груп пачулі чарговую гісторыю Свэна Нурдквіста пра Ражство ў доміку Пэтсана. Перад Ражством спраў у Пэтсана і Фіндуса безліч: трэба расчысціць снег, схадзіць за елкай, купіць пачастунак і, зразумела, спячы імбірнае печыва. Але ў самы непадыходны момант Пэтсан прымудраецца падвярнуць нагу. Няўжо сябры застануцца без калядных вячэры і елкі? Малыя з нецярплівасцю чакалі, чым скончыцца гэтая перадсвяточная гісторыя.

 

У краіне герояў Мікалая Носава

9 снежня ў бібліятэцы № 7 члены дзіцячага пазнавальнага клуба «Знайка» адправіліся ў літаратурную экспедыцыю па вывучэнні жыццёвага і творчага шляху дзіцячага пісьменніка Мікалая Носава. У ходзе экспедыцыі дзеці пазнаёміліся з біяграфіяй пісьменніка, аналізавалі і абмяркоўвалі прачытаныя апавяданні. Электронная выстава «Вясёлыя кнігі Мікалая Носава» дапамагла пашырыць веды пра творы і пазнаёміла з невядомымі героямі.

 

Пераднавагоднія клопаты ў бібліятэцы

Двойчы збіраліся ўдзельніцы клуба «Мандарынкі» ў бібліятэцы №3 на мінулым тыдні. 6 снежня тут прайшоў майстар-клас ад Ірыны Вараб'ёвай па вырабе навагодніх шароў. Для вырабу незвычайнай елачнай цацкі спатрэбіўся пенапластавы шар, розныя прадметы (гузікі, макароны, кветкі, пацеры, ракавінкі і г.д.), якія потым наляпляліся на шар і ўсё гэта пакрывалася фарбай, таніравалася іншым колерам, упрыгожвалася бантамі і іскрамі. Вынік перасягнуў усе чаканні, кожны рабіў свой шар з думкамі пра будучы год. Прылепленыя ракавінкі – гэта жаданне паехаць на мора ў будучым годзе, прыгожыя гузічкі – жаданне прыгожых нарадаў, сэрцайкі – жаданне прыцягнуць новае каханне або захаваць старае ... 8 снежня ў клубе «Мандарынкі» прайшла фотасесія. У бібліятэцы былі створаны дзве лакацыі: навагодняя і сярод стэлажоў. З дзяўчатамі і дзецьмі працавалі два фатографа каля двух гадзін.

Ліст Дзеду Марозу

Набліжаецца Новы год. Усе дзеці з нецярпеннем чакаюць падарункаў пад ёлачкай. А як хочацца атрымаць менавіта тое, пра што марыш! А каб сапраўды спраўдзілася, можна напісаць ліст Дзеду Марозу. Бо зімоваму чараўніку не складзе працы выканаць жаданне. Але як жа правільна напісаць ліст? Пра што Дзядулі Марозу цікава будзе прачытаць? Пра гэта 6 снежня даведаліся выхаванцы Дапаможняй школы №1 г. Гродна. Даведаліся і напісалі, а таксама размалявалі навагоднюю паштоўку, якую можна падарыць сваім сябрам ці родным. А дапамаглі ім у гэтым супрацоўнікі аддзела абслугоўвання дзяцей ГЦБ ім. А. Макаёнка.

 

Дадатковая інфармацыя