Любімы горад Гродна

9 верасня краязнаўчая гадзіна «Любімы горад Гродна» прайшла для вучняў 2 Б класа СШ №7 ў бібліятэцы №7. З дапамогай электроннай прэзентацыі бібліятэкары пазнаёмілі школьнікаў з шматвяковай гісторыяй роднага горада, распавялі пра вядомыя гістарычныя асобы, такіх, як князь Вітаўт, Давыд Гарадзенскі, Стэфан Баторый, Жан Жылібер і іншых. Рабяты даведаліся, чаму Каложская царква напалову драўляная, як працуе гадзіннік на вежы Кафедральнага сабора і дзе знаходзіцца самая старая тэатральная сцэна Беларусі.

Кансультацыя натарыуса ў бібліятэцы

15 верасня 2021 года ў гарадской бібліятэцы № 10 адбудзецца бясплатная кансультацыя натарыуса Гродзенскай натарыяльнай акругі па пытаннях, звязаных з правядзеннем натарыяльных дзеянняў (афармленне спадчынных правоў, складанне завяшчанняў, афармленне даверанасцяў, дагавораў дарэння, куплі-продажу нерухомай і іншай маёмасці, шлюбных дагавораў). Кансультацыя пройдзе з 12.00 да 14.00. Прыём зацікаўленых грамадзян будзе ажыццяўляцца ў парадку чаргі.

 

Ведай правілы руху!

8 верасня выхаванцы дзіцячага садка № 105 наведалі бібліятэку №10. Малышы сталі ўдзельнікамі урока бяспекі «Ведай правілы руху, як табліцу множання». Для дзяцей былі падрыхтаваныя загадкі і квэсты, якія дапамаглі даведацца шмат новага пра бяспеку на дарозе, а таксама цікавыя гульні і заданні: «Чырвоны-зялёны», «Стрэлка, стрэлка, пакружыць», «Адрамантуй святлафор». Напрыканцы мерапрыемства дашкольнікі паглядзелі вясёлы мульцік, які дапамагае лёгка і проста запомніць асноўныя правілы дарожнага руху.

 

Небяспекі вакол нас

7 верасня супрацоўнік бібліятэкі №1 правяла ўрок-гульню «Небяспекі вакол нас» для выхаванцаў дзіцячага садка № 24. Малышы даведаліся аб правілах паводзін у двары і на вуліцы, аб небяспечных прадметах і прыборах, якія ёсць у доме. У гульнявой форме разгледзелі розныя сітуацыі пра тое, як трэба сябе паводзіць у той ці іншай абстаноўцы, небяспечнай для жыцця або здароўя.

 

Слава Оршы

8 верасня – асаблівая дата ў гістарычнай памяці беларусаў. У 1514 годзе ў ходзе адной з войнаў паміж Маскоўскай дзяржавай і Вялікім княствам Літоўскім маскоўскае войска пад камандаваннем ваяводаў Івана Чалядзіна і Міхаіла Булгакава-Голіцы (пры падтрымцы татарскай конніцы) было разбіта аб'яднанай арміяй Вялікага княства Літоўскага і Каралеўства польскага пад кіраўніцтвам гетмана літоўскага Канстанціна Астрожскага і польскага надворнага гетмана Януша Свярчоўскага. У атрадах польскіх і літоўскіх феадалаў у Аршанскай бітве прымалі ўдзел найміты з некалькіх еўрапейскіх краін і апалчэнне, складзенае з насельніцтва гарадоў і вёсак, якія знаходзяцца зараз на тэрыторыі Беларусі. У савецкі час падзеі 1514 года пад Оршай нават не згадваліся ў падручніках. На хвалі адраджэння нацыянальнай самасвядомасці ў канцы 1980-х гадоў гэта гістарычная дата паслужыла штуршком для аднаўлення святкавання Дня беларускай вайсковай славы. Супрацоўнікі бібліятэкі № 5 у відэароліку паспрабавалі растлумачыць чаму гэтая дата важная для беларусаў.

 

Школа бяспекі для малых

Заняткі ў «Школе бяспекі» прайшла 7 верасня для выхаванцаў дзіцячага садка № 52 у бібліятэцы №4. Дзеці вывучалі правілы пажарнай бяспекі і правілы паводзін дома, на вуліцы, у транспарце, адказвалі на пытанні віктарыны «Зялёны агеньчык», «Дазваляецца-забараняецца», адгадвалі загадкі. Героі мультфільма «Азбука бяспекі» распавялі, як правільна паводзіць сябе ў розных сітуацыях.

 

Дадатковая інфармацыя