Правы дзiцяцi

21 лістапада ў бібліятэцы № 10 прайшло пасяджэнне клуба «Мазаіка», прымеркаванае да Сусветнага дня правоў дзіцяці. На сустрэчы дзеці даведаліся пра гісторыю свята, замацавалі веды аб сваіх правах і абавязках з дапамогай падступных пытанняў і вострых сітуацый. Таксама школьнікі сустрэліся з прадстаўнікамі «Рэгіянальнага цэнтра прававой інфармацыі Гродзенскай вобласці», якія пазнаёмілі дзяцей з «Дзіцячым прававым сайтам», распавядалі пра яго значнасці і каштоўнасці. Сустрэча членаў клуба прайшла вельмі інтэнсіўна і плённа. А ў завяршэнні кожны дзіця атрымаў карысны сувенір ад гасцей цэнтра.

Домікі для птушак

19 і 21 лістапада ў бібліятэцы №7 выхаванцы дзіцячага сада №77 здзейснілі экалагічнае падарожжа «Домікі для птушак». Дзяўчынкі і хлопчыкі пазнаёміліся з разнастайнасцю зімуючых птушак, паўдзельнічалі ў маўленчай гульні «Скажы наадварот», пагулялі ў гульню «Скача шустрая сініца». Дзеці даведаліся, як цяжка жывуць птушкі зімой і чым ім можа дапамагчы чалавек.

Сакрэты даўгалецця

20 лістапада ў гарадской цэнтральнай бібліятэцы імя А.Макаёнка прайшла інфармацыйна-пазнавальная гадзіна «Сакрэты даўгалецця». Дацэнт кафедры нармальнай фізіялогіі УА «Гродзенскі дзяржаўны медыцынскі універсітэт» Каралёў П. М. раскрыў 12 запаведзяў, дзякуючы якім можна пражыць да глыбокай старасці, застаючыся бадзёрым і актыўным. У цэлым, сакрэты даўгалецця зводзяцца да досыць простых правіл – адмовіцца ад шкодных звычак, весці здаровы лад жыцця, больш рухацца, рэгулярна чытаць кнігі і шчыра радавацца жыццю.

 

Легенды зямлі беларускай

21 лістапада ў аддзеле абслугоўвання дзяцей ГЦБ ім. А. Макаёнка для вучняў 3 «А» класа СШ №6 прайшла краязнаўчая гадзіна «Легенды зямлі беларускай». Дзеці пазнаёміліся з легендарным племем Неўры, іх норавамі і пераўтварэннямі. Пачулі легенды пра «янтарны палац і яго гаспадыню», «Караля вужоў», «Папараць кветка». Паразважалі пра назвы беларускіх азёраў і рэк, а потым пазнаёміліся з легендамі паходжання азёр Свіцязь, Нарач, Возера – сэрца. Замацавалі матэрыял праглядам відэароліка «Легенда пра возера Нарач». Напрыканцы мерапрыемства дзеці даведаліся пра легенды Гродна, паглядзелі відэаролік «Нёман і Лаша» і «пазнаёміліся» з прывідамі Стэфана Баторыя, які з'яўляецца на Савецкай плошчы, штабс -капітана Манастырскага ў «Чырвонай зорцы» і прывідам у тэатры лялек.

Яны былі першымі

20 лістапада ў адкрытым інтэлектуальным клубе «Факел ісціны» Гродзенскай гарадской цэнтральнай бібліятэкі імя А.Макаёнка адбылася вечарына памяці «Яны былі першымі», прымеркаваная да 110-годдзя Гродзенскага гарадскога гуртка беларускай моладзі. Удзельнікамі мерапрыемства былі не толькі сябры аб'яднання, але і навучэнцы гандлёвага і політэхнічнага каледжаў. Кандыдат гістарычных навук, дацэнт кафедры турызму і культурнай спадчыны, намеснік старшыні клуба Віталь Рыгоравіч Карнялюк распавядаў аб тагачаснам жыцці Гродна: палітычных, эканамічных, навуковых умовах, рэлігійнай і моўнай палітыцы. А старшыня клуба, знакаміты гродзенскі краязнаўца і педагог Аляксандр Пятровіч Госцеў распавядаў аб дзейнасці Гродзенскага гуртка беларускай моладзі і аб найбольш выдатных сябрах арганізацыі: Людвіке Сівіцкай (Зоські Верас), Адаме Бычкоўскім, Іосіфе Давыдовічы (Юрка Снапко), Адольфе Зенюке, Казіміры Калкі. У канцы бібліятэкары прадставілі выданні пра гісторыю Гродзенскага гуртка беларускай моладзі з фондаў Гродзенскай гарадской цэнтральнай бібліятэкі імя А.Макаёнка.

Дзікія і хатнія – ўсе важныя

20 лістапада прайшло чарговае пасяджэнне клуба «Пралеска» у дзіцячай бібліятэцы №6. Мэта экалагічнай гадзіны «Дзікія і хатнія – ўсё такія важныя» – прывіць любоў да жывёл, навучыць несці адказнасць за чатырохногіх сяброў. Дзеці расказалі пра сваіх хатніх гадаванцаў і вывучылі правілы бяспечнага абыходжання з жывёламі. І ўсе пагадзіліся з тым, што «браты нашы меншыя» робяць жыццё чалавека радасней, вучаць дабрыні.

 

Дадатковая інфармацыя