Год гістарычнай памяці натхніў супрацоўнікаў аддзела абслугоўвання дзяцей Гродзенскай гарадской цэнтральнай бібліятэкі імя А. Макаёнка (вул. Цітова, 12) на стварэнне выставы-кампазіцыі «Гістарычныя славутасці Беларусі» аб шэдэўрах архітэктуры нашай краіны. Раздзелы пазначаны помнікамі розных архітэктурных стыляў, якія з’яўляюцца гонарам кожнай вобласці. На выставе прадстаўлена літаратура аб гісторыі Каложскай царквы, Камянецкай вежы, Нясвіжскага замка і іншых жамчужын беларускага дойлідства.

Гродна – самы прыгожы горад Беларусі са значнай гісторыка-культурнай спадчынай. Але галоўнае багацце горада – людзі, якія аддалі свой інтэлект, энергію, творчасць на карысць эканамічнага, навуковага, культурнага развіцця Гродна. У канцы XIX – пачатку XX стагоддзя звання «Ганаровы грамадзянін горада Гродна» былі ўдастоены людзі розных прафесій, пасад, воінскіх званняў. Сярод іх губернатар Іван Мікалаевіч Скварцоў,пісьменніца Эліза Ажэшка, фотомайстар Зельман Янкелевіч Карасік, купец Якаў Фёдаравіч Кнотэ. Больш падрабязную інфармацыю пра слынных асоб вы даведаецеся з матэрыялаў выставы «Ганаровыя грамадзяне горада Гродна» ў бібліятэцы № 1 (вул. Даватара, 21).

Выстава літаратуры «Славутыя родам сваім» у бібліятэцы № 2 (вул. Белуша, 37) знаёміць з літаратурай пра жыццё і дзейнасць знакамітых прадстаўнікоў беларускіх дынастый: Радзівілаў, Сапегаў, Храптовічаў, Алелькавічаў (Слуцкіх), Гальшанскіх, Хадкевічаў. Адны з іх праславіліся подзвігамі, мудрай дзяржаўнай і палітычнай дзейнасцю. Іншыя падтрымлівалі развіццё навукі, культуры і мастацтва. 

У бібліятэцы № 3 (вул. Лізы Чайкінай, 49) дзейнічае выстава літаратуры «Гістарычныя славутасці Беларусі», на якой прадстаўлены кнігі аб замках і палацах, фартах і крэпасцях, страчаных помніках архітэктуры нашай краіны. Выстава суправаджаецца папяровымі макетамі гістарычных збудаванняў, якія стварыў гродзенскі краязнаўца Ігар Адасік. 

Выстава літаратуры «Вуліцы герояў» у бібліятэцы № 4 (вул. Дамброўскага, 55) прысвечана юбілейным датам ваенных дзеячаў, чые імёны носяць вуліцы нашага горада. Многія гродзенцы часам не ведаюць, якія подзвігі ўвекавечаны ў назвах вуліц, на якіх яны жывуць.  Імёны гэтых людзей – гераічныя старонкі гісторыі Беларусі і Гродна. На выставе прадстаўлены выданні пра Вольгу Санфіраву, Георгія Захарава, Пятра Кажамякіна, Васіля Сакалоўскага, Івана Болдзіна, Гая Гая.

Старажытныя гарады Беларусі прайшлі няпросты шлях гістарычнага развіцця, іх жыхары стварылі і захавалі для нашчадкаў значную культурную спадчыну, вядомыя постаці – ураджэнцы гэтых мясцін – праславілі справамі сваю малую радзіму. З дапамогай матэрыялаў выставы «Таямніцы старажытных гарадоў Беларусі» ў бібліятэцы № 6 (пр-т Касманаўтаў, 4а) вы зможаце адправіцца ў падарожжа па старадаўніх гарадах беларускай зямлі.

Духоўным багаццем, атрыманым у спадчыну ад продкаў, мы павінны ганарыцца. Яго трэба берагчы, каб перадаць наступным пакаленням. Наша багацце – народныя святы, абрады, традыцыі. Супрацоўнікі бібліятэкі № 7 (вул. Камарова, 5) прапануюць наведаць выставу «Карагод беларускіх святаў» і даведацца, як у Беларусі святкуюць Каляды, Масленіцу, Вялікдзень, Саракі і Купалле.

Наша зямля – сапраўдная калыска, якая ўзгадавала шмат таленавітых людзей. На выставе «Славутыя постаці Беларусі» ў бібліятэцы № 8 (БЛК, 43) прадстаўлены выданні аб знакамітых асобах розных часоў і эпох. За датамі і фактамі гістарычных падзей абавязкова стаяць людзі, пра якіх ў летапісах, дакументах, манаграфіях напісана не так шмат. Хочацца даведацца пра іх больш: як яны жылі, чаму радаваліся і пра што марылі, каб наблізіць да сябе той далёкі час і стаць сведкам падзей з глыбіні стагоддзяў. 

Гродна – адзін з найстарэйшых гарадоў Беларусі. З кожным днём ён расце і прыгажэе. Памяць пра падзеі шматвяковай гісторыі горада жыве не толькі ў помніках архітэктуры і мемарыяльных дошках, але і ў назвах вуліц. У бібліятэцы № 9 (вул. Урублеўскага, 33) на выставе «Вуліцы Гродна – наша памяць» прадстаўлены выданні аб жыцці і дзейнасці Напалеона Орды, Уладзіміра Караткевіча, Андрэя Данілава, Віктара Саяпіна, Аляксандра Курловіча, чые імёны носяць вуліцы горада.

Адным з найбольш важных і значных аспектаў традыцыйнай культуры Беларусі з’яўляюцца народныя промыслы і рамёствы. Яркая нацыянальная самабытнасць і непаўторнасць – асноўнае адрозненне ў беларускіх мастацкіх промыслах. У бібліятэцы № 10 (вул. Пестрака, 36) арганізавана выстава «Гісторыя беларускіх рамёстваў». Тут можна азнаёміцца не толькі з літаратурай аб асноўных відах народных промыслаў і рамёстваў, але і ўбачыць вырабы з саломкі, гліны, лазы, створаныя народнымі майстрамі. 

Выстава «Жаночыя лёсы ў гісторыі Гродна» ўаддзеле абслугоўвання і інфармацыі Гродзенскай гарадской цэнтральнай бібліятэкі імя А. Макаёнка (вул. Савецкіх Пагранічнікаў, 51/2) змяшчае кнігі, часопісы і фактаграфічную інфармацыю аб знакамітых гродзенках. Сярод іх Бона Сфорца, Саламея Дэшнер, Ларыса Ляшэнка, Вольга Корбут, Вольга Соламава і іншыя выбітныя прадстаўніцы.